نَعنِش
انا مواطن من عَم العوام والعَام يِعِم
وعَم عوام الناس وانا شخص(ن) مهو مهم
مرار طريق(ن) ومن توالي جيل(ن) هَرِم
رديت عتيق الدفاتر وفتشت كم(ن) على كم
وشمرت عن ساعدي واثنيت انا الكُم
وحاورت انا ذاتي والحوار مع نفسي احتدم
وخطيت افكاري بقرطاس وخطها حِبر القَلَم
خابر(ن) عندي مخزون(ن) من قدم
مخزون الاجداد ومن لحاويس صحون الدِسم
حتى مخزون الاجداد ع ما فيه إِنقسم
لحقنا اللي لحقناه واللي لجيلي إِنْقَسَم
لحقنا شوية احترام ونثة كرامة ومناداة المحترم
ومن بقايا الجاهلية لملمت شوية شيم
صبر وشهامة وعزة نفس وكرم
صدق ومروة من مروات ابو سفيان قبل السَلَم
غوثة الملهوف وفزعة الدار ورفع الظُلَم
واشوف تاهت الناس بين دهاليز حروبها والسَّلَم
هيهات العوافي لغَدا المجتمع يعاني السَقم
وتشوف مفاصل عظام الاخلاق طبها وَرَم
ذا دليلي وكل فرد له قصة ورواية اولها وتاليها الندم
ذي حالة وعلى حالتي احوال البشر تِعم
انا تنقل مواصلات وباص العموم دايم مزدحم
غصب(ن) عليَّ مهو بكيفي حقيقة مهي زَعَم
العود إِفطاط والطاب مجخ ومهو صَرَم
فقر ونقر وهم وغم وديَّن وغَرَم
واركب الباص مع الغانم مَّنَّه وجودة وكرم
واسري مع نجم الصباح والله واسابق النجم
واوجه صلاتي وقبلتي يم البيت والحرم
وادعي الله عسى نهاري مريح البال وسَلم
ويندى جبيني وللقرش ركاض بين جواري وخَدَم
أَكِد واشقى وطول نهاري بين السَم والدَم
عرقان شقيان اسود وجه والشمس مثل السَهم
ذبلان باهت(ن) حيلي ومِنهدم
ومن جواي القلب تعبان ومنهزم
وعند دفع الفواتير مقصر ومُتَهَم
لجا راح وراح زَبَد مع السيل العَرم
وكثير من الاحيان امشي واباري الغَمَم
تمشى بلكي حداهم يلحقني وحسب العَشَم
صيدي توفير والوفر يشد المعنوية والهِمَم
واللي قال وش السالفة اقول حمداك ربي حمد(ن) مُتِم
الخيرين والزينين واسأل الله خير(ن) يُدَم
وفي صباح(ن) ندي(ن) والرذاذ على غِصني هجم
مرة ع جناب الطريق منتظر باص ابو الايهم
خويي ورفيقي وصديقي من العودات والله والنِِعم
يمر كثير شي تعرفه وشي متعرفه من اعيال الزَرَم
من هل النعيم وعسى الله يتم عليهم كل النِعَم
واللي جافاهم نعيم الاخلاق والشُح لطيب النفس إلتَهَم
منهم طبطب الزامور يقول انا موجود يا أُمم
العين بالعين لا حيا ولا دخان جَله ولا يَشُم
ومنهم بطناج وعجاج العجل ع مرمى الخشم
ومنهم مقنقن مخوم مروح مقرق إِمشِم
فعفوط سيارة كيا عواية اقساط والراتب عَدَم
ومكتوب عليها بالخط العريض تكفيني فخامة الاسم
ولباقت يبرر مهو ضعف ماتور البَوَق بَوق الحجم
ينوح سيارة الكيا بواقه وبوسط عمان صارت مثل الرخم
وع راس المدب دز ونيرتين بنزين حتى تيجي الزِلِم
ومنهم جاك خص نص تَيّ تَيّ ع جورة المي بالتَمَم
نَعنِش وغسل وجهك بطين اللُئَم
وعطر هدومك وطيَّن لون الملابس والهِدِم
ومنهم يمر مرتين ويلف لفتين منهن لفة جَكَر بالحَتِم
ومنهم يصبح يشوح يلوح من فوق السَنَم
من ورا القزاز يعطيك هزة راس وضحكة صفرا وبسم
ومنهم من يزيد الشِعِر بيت ويهدِم قلبك هَدِم
هذول هم عيال الاجاويد هذول هم اعيال الكرم
ويا ليتني معرفت ولا شفت هذي الايام ايام الخَمَم
ومدري ليه الناس تِصَيَّد بعضها ومن بعضها تِنتِقِم
فوق همي وغمي وجاني وزاد آلامي أَلم
وشديد الوجع من صديق(ن) رماني مسموم السَهَم
صادني في مفرق القلب ومنها طَب قلبي صَمَم
زودة نِفس(ن) وتَباهي ... وكنه قاعد ع راس الهرم
سايق وبيده تلفون يِمَسِج والحالات قُرضة دَيَّن وذِمَم
ولصار فيه عتاب تصير العدو اللدود وانت الخصم
ويقول بكل برود مهنا ولك عندنا مثنى وتعيش وتِرَحَم
وين الشهامة والشيامة وين مٍناقَع الدم
وين التواضع؟ وين الخضاعة؟ وين المروة وين الشِيَّم؟
وين بطون الاناقة والرشاقة والعراقة وين ابو الشَهَم
وين القيافة والنظافة والظرافة وهذا هو المِهِم
وين الشياكة والشراكة والنزاكة والفلاكة وهو الاهم
يناس وين صرنا طِحنا تحت الاخلاق وتعدينا العَجَم
اجيال طاحت طيحات الرشا والدلو في بير الطمم
لَحِقنا الفرنج الحلاقة فرزاتشي وانا من الواقع منصدم
واكل وشرب بالشارع والوجبات جنك فود وقُطَم
لغاويص الشورما والمثومة وريحة النَفَس والفَم
خشن ناعم حيا الله والاندومي لا مذاق ولا طَعِم
والالفاظ حدث لا حرج وكنه لا مدارس ولا علم ولا تَعَلُم
والتحية إمك..اختك..عرضك..مسكينة وش تتحمل هالام
سواقة ترف وعطور Diva Dove ومجالس نَم واكل اللَحم
من برا خزف ومن جوا قَرف وكلامه حَلفان وقَسَم
كحلناها عورناها والجرح على غش الصديد انكتم
وشرينا لباس الذل Levi's وقالوا موضة والموضة تَعَم
وقالوا نَعَم يا شُرت ال F.U.S نَعَم والفين نَعَم
وعهد الشباب في بنطلون ال Jeans انختم
شي إِمَزَع وشي مرقع ومنوع مثل اللي ع الذل إِنفَطَم
وشي إِمَرَط وشي إِمفَرَط وشي مخيط والساتر مُحترم
الله يستر من توالي الايام والساتر هو الرحيم الارحم

kQukAa